..وأنا مع صديقي حول طاولتنا الأنتيكا في قهوتنا العتيقة نحتَسي فنجان قهوة عالريحة، علت الزغاريد وصدحت الأناشيد وقرقعت المفرقعات فوقفنا نستفسر عن الخبر، فأجابنا صاحب القهوة إنها فرحة دخولنا في التاريخ، فلقد وصلت الحفارة وبدأت عملها قبالة ساحل الناقورة، وما هذه الفرحة إلا إحتفالاً باستخراج النفط من عندنا.
سأل صديقي صاحب المقهى … وشو يعني ؟ أجاب صاحبها … ولو!
رح ندفع الديون المستحقة
ورح يصير عنا كهربا 24/24
ورح نزفت الطرقات
ورح نوسّع الاوتوسترادات
ورح يصير عنا نقل مشترك
ورح نوزّع خبز ببلاش
ورح نرجّع الدولار لـ “تّلات ليرات”
ورح نعمل سدود لجمع المي
ورح نوقف إسرائيل عند حدا
ورح نعمل إنتخابات نزيهة
ورح يصير عنا قاضي جريء
ورح يصير عنا ضمان شيخوخة
ورح يصير عنا ضمان صحي مرتب
ورح يصير عنا قانون إيجارات معقول
ورح يرجع السوريون لبلادهم بس الفلسطينيون تعودنا عليهم وسرقولهم بيوتهم
رح نوقّف التعديات عالاملاك العامة، ونرجع حقوق الدولة. في أشياء كتيرة سأخبرك عنها في حينه.
وقف صاحبي مشدوهاً وقال: شو عم تحكي اي متى هيدا؟
أجاب صاحب المقهى … بعد حوالي عشر سنوات سأله صاحبي وبهالوقت…؟
أجاب: مناكل بسكوت، ومنروح بالهليكوبتر منتفرج عليها.
